Dylan & Abigail se Sjarmante Wynplaas Troue in Malmesbury

Dylan en Abby se troudag by die geskiedkundige Kalmoesfontein, die AA Badenhorst Wynlandgoed in Malmesbury, was ’n pragtige voorbeeld van eerlike, vreugdevolle en sjarmante styl. Met ’n geseënde en rustige atmosfeer het die paartjie die natuurskoon van die Swartland omgewing tot sy reg laat kom sonder om die ruimte te oorlaai. Hul benadering tot die dag was deurdag, intiem en gevul met persoonlike besonderhede, wat ’n ontspanne en betekenisvolle atmosfeer verseker het.

Abby het ’n unieke benadering tot haar trourok gekies. Wat oorspronklik ’n eenvoudige ivoorkleurige silhoeët met ’n “boat neck” en elegante oop rug was, is met kreatiewe afwerkings heeltemal verpersoonlik. Deur die moue te laat verwyder en asimmetriese voue oor die middel by te voeg, het sy ’n tydlose bruidsvoorkoms geskep wat vars en uniek gevoel het. As ’n besonder betekenisvolle gebaar het sy selfs haar ma se oorspronklike trourok as ’n verrassings-geskenk in ’n klein herinnering-sakkie laat omskep.

Vir die stylvolle troudekor en algehele voorkoms het die paartjie die ongekunstelde sjarme van die werkende wynplaas omhels. Die venue se argitektuur, kaal houttafels en nostalgiese skoolstoele het as natuurlike hoofelemente van die dekor gedien. Die kleurskema is vars en neutraal gehou, met ’n fokus op groen en wit blommerangskikkings. Olyftakke, wat uit die tuine van vriende versamel is, is met fynbos-geïnspireerde rangskikkings gekombineer om ’n romantiese, natuurlike gevoel te skep wat die skoonheid van die streek weerspieël.

Hierdie storie bied volop trou inspirasie en kreatiewe trou idees vir bruide wat op soek is na bekostigbare opsies sonder om op elegansie in te boet. Dylan en Abby se dag herinner ons daaraan dat die mees onvergeetlike oomblikke ontstaan wanneer die fokus bly op dit wat werklik saak maak. Rol af om meer van hierdie besonderse troudag te sien.

Trourok:

Ek het my trourok gekry deur Once Worn Bridal. Dit was die eerste rok wat ek aangepas het! Maar ek dink dit is omdat hulle baie deeglik is voor jou konsultasie om te vra oor wat jy soek en graag wil hê. Ek het ook gehou van die idee van ’n tweedehandse rok dra. Eers het ek my ma se ou trourok aangepas, maar toe het ons besluit dat dit nie gaan werk nie. Ek het toe as ’n geheim geskenk haar rok laat maak in ’n klein sakkie vir my ma en daar was trane.

My rok was eenvoudig en stylvol, “boat neck” met ’n lae/oop rug in ivoor. Ek het die moue laat afhaal en asimmetriese voue oor die middel laat inwerk. So, al was die rok tegnies voorheen al gedra deur iemand, het ons hom heeltemal “nuut” gemaak.

Meer oor AA Badenhorst Wynlandgoed

Teen die heuwels van die Paardeberg in die Swartland, minder as ’n uur vanaf Kaapstad, lê Kalmoesfontein Plaas – die tuiste van AA Badenhorst Familie Wyne. Met asemrowende uitsigte, karaktervolle plaasgeboue en verskeie fotogeniese ruimtes is dit die perfekte bestemming vir ’n onvergeetlike troue. Die kreatiewe span van organiseerders en “mooi-makers” werk saam met elke paartjie om ’n unieke viering te skep – van seremonies in die wynkelder en drankies op die terrasse tot onthale en dans onder die sterre. Stylvolle akkommodasie vir tot 18 gaste en glamping-opsies maak van die plaas ’n ideale droom naweek. Gaste kan ook uitsien na heerlike plaaskos met moderne invloede en Kalmoesfontein se kenmerkende groot vure. Hier word wynlandskap, plaaslike sjarme, goeie kos en liefde op ’n besonderse manier gevier.

Paartjie se Verlowing:

Dylan het vir die naweek afgevlieg Kaap toe om met Abigail se ouers te praat en hulle seëning te kom vra. Hy was baie angstig, al het hulle al baie daaroor gepraat. Daar was geen geheim rondom sy doel vir die naweek se kuier nie. Dylan kom van Hilton, KZN, en dog dit snaaks om “labola”-geskenkies te bring vir my ouers – nuwe gholfballe vir pa en ma se gunsteling parfuum. Glo dit het die ys mooi gebreek, want als het goed afgeloop!

Die volgende dag het ek vir ons ’n wynproe en middagete bespreek op Kalmoesfontein – AA Badenhorst Familie Wynplaas. Ek wou hê Dylan moet die plaas sien waar ek graag “eendag” sou wou trou. Min het ek geweet hy het besluit dieselfde dag, daar en dan sommer ook verloof te raak. Terwyl ek met Semma (die plaas-koördineerder) per WhatsApp bespreek het vir die middagete en wynproe, was Dylan besig om met haar te reël oor die verlowingsplanne!

Wynproe, middagete en groot vraag op Kalmoesfontein – AA Badenhorst Familie Wynplaas:

So, na die wynproe saam met klomp ander mense, was dit etenstyd, en op Kalmoesfontein is elke middagete ’n “staff lunch” waar al die werkers saam in die kombuis kom opskep dit wat tuis gemaak is. Maar toe ons twee klaar opgeskep het, in plaas van saam met almal te gaan sit en eet, wys Dylan vir my ’n ander klein tafel onder die bome wat net vir twee gedek was.

Toe ons sit om te eet, sê hy dat hy vir my ’n geskenk het – toe gedraai in bruinpapier. Ek maak die pakkie oop en dit is ’n groen Moleskin-joernaal. Binne het hy ’n brief geskryf en toe verduidelik hy dat die boek bedoel is vir ons om ons troue saam te beplan en notas te kan maak oor alles van kos- en musiek keuses tot blomme- en kleurskema besluite. Hy blaai toe verder aan in die boek tot hy by ’n uitgesnyde venster kom, en daar lê die ring en hy sê, “maar ons kan nie ’n troue beplan sonder om verloof te wees nie”.

Hy staan toe op en loop om my om op een knie te kom buig voor my om my ordentlik te vra.

Huil en lag amper onder beheer, kom een van die werkers wie die wynproe gedoen het met ’n bottel bubbles om vir ons geluk te sê. Almal het geweet!

Verloof- en Trouringe:

Dylan se troupak was spontaan deur my uitgekies toe ek eendag toevallig deur Country Road gestap het en aan ’n vlootblou wolbaadjie geraak het. Ek het daar en dan geweet hy sal daarvan hou en ’n hele pak gekoop – navy broek, wit “travel shirt” en baadjie. Die volgende week opgevlieg KZN toe met die paksak sonder om vir hom te sê. (Hy was so bly, want hy hou niks van winkels toe gaan nie). Skoene en beld by CurveGear gekry. Das was deur ’n vriend gemaak – Baggins Custom Kydex and Leather Gear.

Dylan het sy eie boutonnière gemaak.

Trou Dekor en Styl:

Ons was al klaar verlief op die plaas en wou graag die “rustic”, plaas-tema behou. Ons het daarom baie min dekor gebruik met kaal houttafels en ou skoolstoele wat Kalmoesfontein al klaar het. Blomme was net groen en wit. Ons het olyftakke by vriende se tuine gekry en ander fynbos-tipe blomme gekoop. Daarom was die kleurskema redelik neutraal.

Trou Begroting en Beplanning:

Die paartjie het hul selfdoen-troue vir 66 gaste binne ’n begroting van R200 000 beplan. Hulle het net in ses maande van hul droomdag ’n werklikheid gemaak.