Coenie & Jennifer se baie mooi plaas troue

Mooi Troues lesers is erg versot op Plaas Troues.  So ons is baie bly dat ons vandag die voorreg het om Coenie en Jennifer se mooi plaas troue met ons lesers kan deel.  Boonop is dit nie net ʼn plaas troue nie, maar ook ʼn doen-dit-sel plaas troue.  Ekstra bonus.

Word geïnspireerd deur die pragtige paartjie se troue.

Hoe het julle ontmoet?

Ons het iewers in ʼn bos buite Nelspruit tydens die 2008 Sasol Rally mekaar onmoet (alhoewel ons omtrent 5km van mekaar af in Pretoria gebly het)!  Ek (Jen) het “Promotional goods” verkoop en Coenie was op ʼn manne-naweek met vriende.  Ons het vlugtig aan die gesels geraak toe Coenie my koshuis baadjie herken het as een van Huis Onderstepoort by Tuks maar hy het weer vinnig in die skare verdwyn.
Ek was baie verlig toe die ou met die mooi groen oë weer kom gesels het tydens die laaste dag (en my nommer gekoop het by die ander personeel).

Hoe het julle verloof geraak?

Coenie het op daai stadium in Windhoek gewoon en het huis toe gekom vir ʼn troue.  Hy’t toe sommer gereël dat ons weg gaan Drakensberge toe om kwaliteit tyd saam deur te bring.  Daar het al sy “Vra-planne” skeef geloop…  Dit het heel naweek gereën so die perd-rit en piekniek was uit.  Sy planne moes verander na wegneem pizza voor die kaggel (met nat hout) waar ons aan die gesels geraak het.  Hy’t so stuk-stuk redes genoem waarom hy lief is vir my en toe uiteindelik die ring verskyn en gevra of ek met hom sal trou.

Hoe lank was julle saam voor julle getroud was?

Net-net kort van 7 jaar.

Advies wat julle aan ander paartjies kan gee:

Jen:

Deel werk/take uit sodat jy nie uitbrand nie.  Vriende en familie wil graag help en betrokke wees met die beplanning en reëlings.   Maak gebruik van hulle!  En op die dag – dit wat nie gedoen is nie gaan niemand mis nie (niemand gaan eers weet as iets nie perfek was soos wat jy beplan het nie) en wat maak dit in elk geval saak?  Mens moet mos die dag geniet!

Coenie:

Moenie ʼn klomp skuld maak om troue te hou nie, besluit vooraf wat is vir julle belangrik en spandeer liewers bietjie ekstra daarop.