Juan & Oriane se Kleurryke Troue in Wellington

Juan en Oriane se kleurryke troue in Wellington was ŉ ware fees van kleur en styl – ŉ geleentheid wat julle nie wil misloop nie! Hierdie pragtige troue het die perfekte balans getref tussen ŉ minimalistiese, moderne atmosfeer en ŉ hartlike, verwelkomende gevoel, met kleurvolle blom ontwerpe wat regdeur gesien kon word. As blomme jou hart vinniger laat klop by troues, behoort hierdie een bo-aan jou lys te wees!

Ons is heeltemal verlief op Oriane se elegante, simplistiese trourok. Die stylvolle ontwerp met ŉ groot strik aan die agterkant en ŉ subtiele gedrapeerde neklyn het haar rok ŉ uitsonderlike elegansie gegee. Juan het net so elegant gelyk in sy swart pak en strikdas, wat perfek by die deftige voorkoms van die troue gepas het.

Monique, die uiters talentvolle bloemis en eienaar van Tilted Tulip, het al die asemrowende blom ontwerpe geskep en gestileer. Van die bruid en haar strooimeisies se ruikers tot die seremonie se skouspelagtige blomme, elke detail was perfek uitgevoer.

Die buitelug seremonie langs die dam was ŉ ware hoogtepunt. ŉ Pragtige, kleurvolle blom struktuur het die paartjie omraam en ŉ betowerende atmosfeer geskep. Selfs hul troukoek is buite gesny, omring deur helder, kleurvolle blomme. Ons is totaal oorweldig deur die kreatiewe blom ontwerpe wat hierdie dag so spesiaal gemaak het.

Die onthaal in die glaskas lokaal was net so indrukwekkend. Kleurvolle blomversierings was oral te sien, en die lang tafels met hul ligte, neutrale kleurskema en moderne, deurskynende stoele het perfek in die spasie gepas. Tilted Tulip het ook die pragtige installasies bokant die dansvloer gedoen, asook die blomme op die tafels. Die bruid self het gesorg vir die pilaar kerse, wat ŉ warm atmosfeer geskep het vir die aandete.

Rol gerus verder af om meer te lees oor Juan en Oriane se kleurryke troue in Wellington.

Paartjie se Liefdesreis:

Juan en ek kom albei van ŉ klein dorpie in Limpopo, Phalaborwa, waar ons grootgeword het. Ons het mekaar geken maar het nie regtig dieselfde vriende gehad nie. ŉ Paar jaar na hoërskool het Juan Kaap toe getrek, terwyl ek in Potchefstroom gaan studeer het. Tydens ŉ koshuis-toer in Stellenbosch het ek en Juan mekaar weer ontmoet en het hy my uitgevra. Ons het vir ete na Thirsty Scarecrow op die R44 toe gegaan en daarna ŉ McFlurry gekry en op die pragtige strand gaan stap. Ons het die beste tyd gehad, heerlik gesels en van daardie dag af gesels ons nog elke dag en ons vriendskap het in liefde verander. Hy het my hart gesteel en ek syne. Nadat ek my studies voltooi het, het ek Kaap toe getrek en dis waar ons reis as ŉ paartjie begin het.

Op 29 Januarie 2022, ŉ mooi somersdag het Juan my verras met ŉ piekniek by die pragtige Boschendal. Ons het die heerlike piekniek onder die bome geniet en toe ek weer sien, was Juan op sy knieë met die breedste glimlag en met ŉ krapperige keel van die senuwees het hy die vraag gevra “SAL JY MET MY TROU?” Als om ons was pragtig, die groen gras, die son wat helder skyn en die pragtige verloof ring wat blink op my vinger. Die dag was vol liefde met al ons naaste familie wat ons omring het en ŉ fotograaf wat elke oomblik op kamera kon vasvang.

Trourok:

Nog voordat ek en Juan verloof was, het ek my droom rok op die internet gesien en dadelik verlief geraak op die Milla Nova Suzette-ontwerp. My trou rok is van die bekende Milla Nova-handelsmerk, en die naam van die rok is Suzette. Dit is ŉ pragtige, eenvoudige en elegante wit rok met ŉ unieke styl. My gunsteling kenmerke is die strik aan die agterkant en die elegant gedrapeerde neklyn. Die rok het ook ŉ pragtige verlengde trein. Ek het my trou rok met ŉ skitterende sluier gepas, wat die hele voorkoms perfek afgerond het.

Veloof- en Trouringe:

My verloofring het Juan en ek saam laat maak deur die talentvolle Terusa Anne Jewellery. Ek het vir haar my idees gewys, en sy het vir my die mooiste roosgoud ring met ŉ ovaal moissaniet steen ontwerp, beklemtoon deur ŉ versteekte diamant-halo. My trouring is ŉ fyn diamant band met roosgoud wat perfek by my pragtige verloofring pas.

Juan se trouring is ŉ swart Titanium band. Die ring is eenvoudig en pas perfek by Juan se styl. Dit gee ŉ moderne en elegante voorkoms. Die eenvoud van die ring weerspieël sy smaak vir minimalistiese en tydlose ontwerpe.

Meer oor Tilted Tulip:

Monique Gouws is die eienaar en hoof bloemis van Tilted Tulip, ŉ blomontwerp-besigheid gebaseer in Somerset-Wes wat wyd-en-syd oor die streek bedryf word. Tilted Tulip spesialiseer in blommerangskikkings vir troues en ander geleenthede. Monique het van kleins af ŉ diep liefde vir blomme ontwikkel en streef daarna om elke bruid en kliënt se blomme drome te verwesenlik. Tilted Tulip verskaf al die blom-elemente wat nodig is vir troues en funksies en verseker dat slegs blomme van die hoogste gehalte gebruik word. Hulle stel ook graag unieke blomsoorte voor wat kliënte dalk nog nie gesien het nie.

Benewens blomme, bied Tilted Tulip ook kerse en kershouers aan, aangesien Monique glo dat kerse ŉ integrale deel van die dekor prentjie is. Hulle voorsien soms ook ekstra dekor items soos servette en onderborde.

Monique beskryf haarself as “hopeless romantic” en haar styl as tuin-geïnspireerd, wat perfek aansluit by haar werk in die trou industrie. Haar passie vir romanse versterk haar liefde vir hierdie spesifieke mark.

Gunsteling herinneringe van die paartjie se troudag:

Ons gunsteling herinneringe van ons troudag was verseker die kosbare tyd wat ons saam mekaar gedeel het deur die loop van die dag. Hoe lekker dit was om al ons naaste mense bymekaar te hê in een plek, familie en vriende van oral af. Die oomblik toe ek en Juan mekaar vir die eerste keer by die kansel sien, was onvergeetlik. Ons eerste dans as Mnr. en Mev. Buitendach. Alles was perfek en die dag het so mooi verloop. Ons liefde en herinneringe van ons troudag sal ons altyd koester.

Raad aan paartjies wat nou besig is met hul trou reëlings:

Onthou, jou troudag is ŉ eenmalige viering, nooi die regte mense en probeer soveel as moontlik inneem, almal sê dit, maar die dag is regtig in ŉ oogwink verby. Vertrou julle eie oordeel, neem jou tyd met verskaffers en moenie tevrede wees met enigiets minder as perfeksie nie.

Trou Venue:

Au’d Hex, is geleë in die hartjie van Wellington. Die eerste ding wat my vasgevang het van dié venue was die pragtige en kleurvolle roostuine wat die glas onthaal area omring. Juan het verlief geraak op die hout dek wat oor die dam strek met die skilderagtige berge in die agtergrond. Die gaste huis, met die gevoel van ŉ historiese Manor House, het ons altwee se asem weggeslaan. Ons was beïndruk hoe naby als aan die gaste huis was en ons gaste het nie nodig gehad om rond te ry of ver te loop om by die onthaal of seremonie uit te kom nie.

Trou Dekor en Styl:

As ŉ bloemis wou ek helder en vrolike kleure in ons trou-dekor inkorporeer terwyl ons die algehele voorkoms natuurlik en moeiteloos hou, met kandelare wat ŉ romantiese atmosfeer skep en disko balle vir ons prettige vieringe.

Trou Diensverskaffers wat uitgestaan het vir die paartjie:

Danelle Stofberg en Liandri Photo and Film het die vreugde en liefde van ons spesiale dag pragtig op kamera en video vasgevang. Hulle het elke oomblik met soveel sorg en talent gedokumenteer, wat ons herinneringe vir altyd lewendig sal hou.

Tilted Tulip het ons troudag omskep in ŉ pragtige, kleurvolle kunswerk met die mooiste blomme. Sy het elke detail met sorg en kreatiwiteit hanteer, wat ons dag regtig spesiaal gemaak het. Die blommerangskikkings was asemrowend en het die mooiste atmosfeer geskep wat ons en ons gaste betower het.

DJ Pepe het ŉ onvergeetlike en vermaaklike tyd geskep. Hy het die dansvloer lewendig gehou en ons gaste van vreugde laat straal!

Taste Ateljee het heerlike kos bedien, en al ons gaste kon nie ophou praat oor hoe lekker hulle geëet het nie.

Eerste Dans:

“Growing Old With You” – Restless Road

Trou Begroting en Beplanning:

Die troue het 76 gaste gehad, met ŉ begroting van R4 600 per gas. Hulle het 1 jaar en 9 maande aan die beplanning van die troue spandeer. Dit was ŉ selfdoen-troue, wat beteken dat die paartjie alles self georganiseer het.