Hoe om die perfekte trou venue te kies? Dis ’n vraag wat ons gereeld ontvang by Mooi Troues. Daarom deel ons graag ’n paar belangrike riglyne in hierdie artikel om die proses vir julle makliker en minder oorweldigend te maak. Om die regte venue vir julle troudag te kies, hoef beslis nie stresvol te wees nie.
By Mooi Troues bied ons trougids van die mooiste trou venues in Suid-Afrika. Ons nooi julle uit om die Mooi Troues Trougids te besoek. Daar sal julle ’n verskeidenheid venues regoor die land vind om die perfekte een vir julle spesiale dag te kies.
Wanneer jy jou troubeplanning aanpak, is die venue gewoonlik die eerste groot besluit wat geneem moet word. Eers daarna kan jy jou aandag verskuif na ander belangrike diensverskaffers soos die fotograaf, dekor en nog vele meer.
Hierdie artikel is deeglik saamgestel en bevat baie waardevolle wenke en insigte. Lees dit dus asseblief sorgvuldig deur om seker te maak jy mis niks belangriks nie.
Aantal Gaste:
Die aantal gaste op julle gastelys speel ’n deurslaggewende rol in die keuse van ’n geskikte trou venue. Daarom is dit belangrik om vroegtydig ’n voorlopige gastelys op te stel, insluitend die maksimum aantal mense wat julle beplan om te nooi.
Verskillende trou venues bied verskillende kapasiteite en pakkette aan. Dit maak nie sin om venues te oorweeg wat buite julle getalle val nie. As julle byvoorbeeld 50 gaste het, is dit onprakties om te kyk na venues wat 300 tot 500 mense kan akkommodeer en andersom ook.
Om ’n venue te kies wat by julle gaste tal pas, help nie net met die praktiese beplanning nie, maar dit kan ook ’n groot verskil maak in terme van kostes. Groter venues wat normaalweg groot troues huisves kan duurder wees. Selfs al gebruik julle net ’n kleiner deel van die ruimte.
Begin dus heel eerste deur te bepaal hoeveel gaste julle wil nooi – dit sal die res van die beplanning baie makliker maak.
Die ligging van die trou venue:
Die ligging van julle trouvenue is een van die belangrikste besluite wat julle gaan neem. Dit beïnvloed nie net julle begroting nie, maar speel ook ’n groot rol in die styl, gevoel en atmosfeer van die troudag.
Vra julleself af: Wil julle in die stad, op die platteland, in ’n woud, by die see, of dalk in die Karoo trou? Die fisiese ligging van die venue skep die raamwerk vir julle hele trou ervaring. Onthou, al julle trou gaste sal na hierdie plek moet reis, so oorweeg gerus hulle gerief ook.
As julle beplan om in ’n kleiner dorpie of afgeleë area te trou, maak seker daar is genoeg verblyf opsies beskikbaar vir al julle gaste. Logistiek is net so belangrik! Kyk of diensverskaffers soos fotograwe, dekor- en spysenier verskaffers beskikbaar en bereid is om na die area te reis.
Onthou: die ligging bepaal baie meer as net ’n mooi uitsig. Dit beïnvloed praktiese aspekte, koste, toeganklikheid en selfs gaste se algehele ervaring van julle troudag.
Is daar verblyf by die venue of naby die venue?
Verblyf is ’n baie belangrike aspek van troubeplanning. Veral as julle gaste van ver af kom om die troudag by te woon. Maak seker daar is voldoende verblyf opsies beskikbaar, óf by die venue self óf in die onmiddellike omgewing.
Vra die venues op julle kortlys presies hoeveel gaste hulle kan akkommodeer met hul eie verblyf. Indien hulle nie oor verblyfgeriewe beskik nie, vind uit of hulle saamwerk met nabygeleë gastehuise of lodges. Anders of hulle julle kan verwys na betroubare opsies.
Dit is ook belangrik om self na die beskikbare verblyf te kyk en seker te maak dit pas by wat julle vir julle gaste in gedagte het. Indien julle iets stylvol en luuks verkies, sal dit nie help as die nabygeleë verblyf ver onder daardie standaard is nie.
Onthou, verblyf kan ’n groot trekpleister wees vir gaste, of ’n struikelblok as dit onvoldoende of onbevredigend is. Indien daar nie genoeg verblyf naby die venue is nie, moet julle dalk ook begroot vir die huur van ’n vervoerdiens om gaste heen en weer te ry.
Foto geleenthede:
Daar is ’n groot verskeidenheid trou venues beskikbaar, van luukse en peperduur plekke tot bekostigbare en gemaklike opsies. Wat julle kies hang af van julle persoonlike smaak én julle begroting. Onthou: die besluit lê by julle as paartjie, en dit moet by julle droomdag pas.
Kom ons gesels ’n bietjie oor foto geleenthede. Goeie foto’s is ’n belangrike deel van enige troue. So kyk gerus op die venue se webwerf of hul profiel op Mooi Troues se Trougids vir voorbeelde van troufoto’s wat daar geneem is. Let op of daar spesifieke areas of agtergronde is wat julle aantrek.
Gesels ook met julle fotograaf en vind uit of hulle al voorheen by die venue gewerk het. Indien julle nog nie ’n fotograaf gekies het nie, gaan loer op die venue se sosiale media vir inspirasie en idees van vorige troues.
Vra die venue waar paartjies gewoonlik hul foto’s neem soos familie portrette, paartjie foto’s en spontane oomblikke. As julle opsoek is na iets uniek of spesifiek, maak seker daar is sulke opsies op die terrein of in die omliggende area.
Die regte foto ligging dra grootliks by tot die herinneringe van julle dag! Maak dus seker die venue bied geleenthede wat julle visuele droom kan waar maak.
Is daar ’n spasie vir julle trou seremonie?
Die seremonie is een van die mees betekenisvolle dele van julle troudag, en daarom is dit belangrik om seker te maak daar is ’n geskikte area by die venue waar dit gehou kan word.
Indien julle droom van ’n buitelug seremonie, vra die venue watter alternatiewe hulle bied in geval van slegte weer. Onweer, reën of wind kan vinnig planne ontspoor, daarom is dit belangrik om ’n plan B te hê wat julle ook gelukkig sal maak.
Maak dus seker daar is ’n toegewyde spasie, binne of buite, wat geskik is vir die seremonie. Dit gee nie net gemoedsrus nie, maar help ook met die vloei van die dag en die beplanning van dekor, sitplek en klank.
Venue koste:
Soek na trou venues wat binne julle begroting val, maar wees ook realisties en oopkop. Moet julle nie te vinnig laat afskrik deur ’n venue wat luuks lyk nie. Die prysverskil is soms nie so groot soos wat mens sou dink nie.
As ’n venue aan al julle vereistes voldoen en die regte gevoel vir julle troudag gee, dan is dit die moeite werd om die koste daarvan ernstig te oorweeg. Prys behoort die volgende oorweging te wees, eerder as die eerste – veral as die venue alles bied waarna julle soek.
Onthou: waarde vir geld is belangriker as net die prys op sigself.
Watter deposito’s moet betaal word?
Maak van die begin af seker wat die deposito vereistes by elke trou venue is. Baie venues vereis dat ’n deposito binne 24 tot 48 uur betaal word om die datum te bevestig. As dit nie betyds gedoen word nie, kan julle maklik die datum verloor.
Vra dus presies hoeveel die deposito beloop, wanneer dit betaal moet word, en watter betaling opsies beskikbaar is. Hierdie inligting help julle om ’n realistiese tydlyn en begroting te beplan sonder onnodige stres.
Hoe lank voor die tyd moet mens die venue bespreek?
Baie gewilde trou venues word lank vooruit bespreek,soms selfs meer as ’n jaar voor die tyd. Sommige venues bied ook meer as een trou geleentheid per naweek aan, wat beteken julle sal moet vinnig optree as julle ’n spesifieke datum in gedagte het.
Dis belangrik om uit te vind hoe ver vooruit die venue besprekings aanvaar, sodat julle betyds kan beplan. Hoe vroeër julle bespreek, hoe beter is julle kans om daardie droom venue vir julle spesiale dag vas te maak.
Voorafbeplanning is die sleutel om teleurstelling te voorkom en julle eerste keuse-venue te verseker.
Wat is ingesluit by die venue pakket?
Elke trou venue bied verskillende dienste en fasiliteite aan as deel van hul pakket. Sommige sluit verblyf, spyseniering, die opstel van tafels en stoele, kelners en selfs kook geriewe in, terwyl ander net die basiese venue ruimte voorsien.
Vra gerus watter produkte en dienste ingesluit is, soos voldoende sitplekke, eetgerei, glase en linne. Hoe meer julle weet, hoe makliker sal dit wees om te bepaal watter bykomende items nog gehuur moet word by ’n dekor- of verhuring maatskappy.
’n Duidelike begrip van wat ingesluit is, help julle om realisties te beplan, koste te verminder en onaangename verrassings te vermy.
Wat is nie ingesluit in die pakket nie?
Net so belangrik as wat ingesluit is, is dit om te weet wat nié by die venue se pakket ingesluit is nie. Vra vooraf watter dienste of items uitgesluit is, en of julle julle eie dekor, meubels of diensverskaffers mag inbring.
Sommige venues werk slegs met ’n goedgekeurde lys van diensverskaffers, wat beteken julle keuses mag beperk wees. Dit is dus noodsaaklik om uit te vind of daar enige beperkinge of reëls is wat julle beplanning kan beïnvloed.
’n Duidelike begrip van wat nie ingesluit is nie, sal help om ekstra kostes te identifiseer en onaangename verrassings of teleurstellings op die laaste nippertjie te vermy.
Spyseniering:
Binnehuis-spyseniering: Sommige venues het hul eie spyseniering-span en werk met ’n interne sjef wat die kos op die dag voorberei. Indien dit die geval is, is dit belangrik om die sjef te ontmoet en die beskikbare spyskaart-opsies te bespreek. Indien julle ernstig oor die venue is, reël ’n proe-sessie sodat julle seker kan maak die kos voldoen aan julle verwagtinge en styl.
Kan julle eie spyseniering ingebring word? Indien die venue hul eie spyseniering doen, maar julle verkies om ’n eksterne spysenier te gebruik, is dit noodsaaklik om uit te vind of dit toegelaat word. Sommige venues is baie streng hieroor en laat slegs hul eie span toe.
Aan die ander kant, as die venue nie self spyseniering aanbied nie en julle het ook nog nie ’n spysenier in gedagte nie, vra gerus of hulle ’n lys het van betroubare spyseniers wat al voorheen by die venue gewerk het. Dit kan julle baie tyd en moeite spaar.
Hoe lank is die venue beskikbaar?
Dit is belangrik om te weet hoe lank voor die troudag julle toegang tot die venue het. Aangesien dit direk beïnvloed wanneer julle met die opstel werk kan begin. By baie gewilde venues met besige skedules mag julle dalk eers op die oggend van die troue of, indien beskikbaar, die vorige aand kan begin voorberei.
Elke venue het sy eie reëls en beskikbaarheid, en dit behoort duidelik uiteengesit te word in julle kontrak. Maak dus seker julle vra hieroor. Bbeplan vooruit sodat daar genoeg tyd is vir dekor, spyseniering, klank-toetsing en ander voorbereidings.
Is daar ʼn koördineerder op die dag?
Al is dit ’n ekstra uitgawe, is ’n koördineerder op die dag van die troue beslis die moeite werd. Geen bruid behoort op haar troudag bekommerd te wees oor of die kerse aangesteek is en of diensverskaffers betyds opdaag nie.
Vra die venue of hulle ’n op-die-dag-koördineerder aanbied, en kry duidelikheid oor presies watter take daardie persoon sal hanteer. Dit kan ’n groot verskil maak in hoe glad die dag verloop.
Indien julle reeds ’n troubeplanner of koördineerder het wat julle deur die beplanning help, maak seker met die venue dat julle eie koördineerder op die troudag mag werk en toegang tot die perseel het. Duidelike kommunikasie voorkom verwarring en verseker ’n vlot verloop van die dag.
Kansellasie klousule:
Hoewel dit iets is wat niemand graag wil oorweeg nie, is kansellasies of datum-verskuiwings soms nodig. Veral as gevolg van onvoorsiene omstandighede soos siekte, nood situasies of selfs natuurrampe.
Vra die venue wat hul kansellasie- of verskuiwingsbeleid behels. Dit is belangrik om duidelikheid te hê oor onder watter omstandighede terugbetalings gemaak word, en teen watter tydlyne. Ook, vind uit of julle die datum kan skuif sonder om die volle bedrag te verloor.
Deursigtige kommunikasie en ’n duidelike kansellasie klousule in die kontrak sal julle gemoedsrus gee indien dinge nie volgens plan verloop nie.
Ander vrae om in gedagte te hou
Afgesien van die groot besluite, is daar ook kleiner, praktiese vrae wat ’n groot verskil kan maak aan julle en julle gaste se ervaring:
Is die venue kindervriendelik?
Indien julle jong gaste verwag, is dit belangrik om te weet of daar veilige ruimtes is waar kinders kan speel of ontspan.
Bied die venue kinderoppasser diens aan?
Sommige venues het opsies of aanbevelings vir kinderoppassers, iets wat ouers baie sal waardeer op die dag.
Is die venue troeteldier-vriendelik?
As julle graag ’n spesiale troeteldier deel van die seremonie wil maak, maak seker of die venue diere toelaat en onder watter voorwaardes.
Hierdie klein vrae wys op goeie beplanning. Dit help om julle troudag vir almal so gemaklik en spesiaal moontlik te maak.
Artikel Krediet:
- Foto’s: Pexels
- Geskrewe: Mooi Troues
