Rok Advies: Waarvoor betaal jy?

cp_0179

Janita Toerien skryf gee jou raad oor die pryse van rokke, waarvoor jy betaal en hoekom jy dit betaal. Janita se artikel as volg:

Hier gaan ons dalk nou aan ‘n lekker sensitiewe onderwerp raak: Die prys van ‘n trourok. ‘n Mens sien gereeld op forums, blogs en hulplyne dat bruide opsoek is na ‘n “goedkoop rok”, “dit moet nie ‘n arm en ‘n been kos nie”, “dis belaglik hoeveel die winkel/ontwerper my op kwoteer het” ens. Bruide het so maklik ‘n uitlaatklep vir wat hulle dink ‘n onregverdige prys is, maar met wat vergelyk hulle dit? Waar is die tweede kant van die storie, van die winkel of ontwerper?

Kom ons begin so: ‘n Besigheid, klein of groot, het uitgawes. Goed soos huur, elektrisiteit, lone en salarisse moet maandelikse betaal word. Daar is dus ‘n sekere hoeveelheid Rand wat per uur gemaak moet word om die basiese bedryfskostes te betaal. Dan, wanneer ‘n rok baie detail het en dus baie ure gaan neem om te maak word die rok duurder. Hoeveelheid ure x R/uur. Hierdie sal dan die basiese of minimum bedryfskostes dek.

Bo-op dit moet daar ‘n wins gemaak word. Sonder wins gaan ‘n besigheid nie groei nie, dit gaan nie uitbrei nie en dit gaan stagneer. Dus, vir ‘n besigheid om te groei, om geld te maak om meer voorraad aan te koop, om te kan voorsien dat nog ‘n werker aangestel kan word en om voorsiening te maak vir onverwagte kostes moet daar ‘n bietjie meer Rand per uur gemaak word. Dit maak tog sin.

Jou verskaffer, of dit nou ‘n winkel, ontwerper, fotograaf of bloemis is, se prys per uur gaan meer word met meer ondervinding agter hulle naam. Dis tog ook logies. In enige ander industrie sou jy met jou baas gaan praat oor ‘n verhoging, want jy voel jou ervaring dra positief by tot die sukses van die maatskappy. So wanneer ons in die trou-industrie vir onsself werk gaan ons waarde per uur toeneem, omdat ons kennis en ervaring meer waardevol is hoe langer ons in die industrie werk.

Dan kom die ding in wat almal wil hê en niemand voor wil betaal nie, die estetiese waarde. Estetiese waarde is hoe mooi iets is vir jou en ja, dit verhoog die prys van ‘n item. Niemand wil vir iets lelik betaal nie, nê? Ons wil in ‘n mooier huis bly, maar dis duurder. Ons wil die Swarovski oorbelle hê, maar dis duurder. Ons is mal oor die rokkie by Forever New, maar dis soveel duurder as die rokkie by Mr Price. Hoekom? Wel behalwe vir kwaliteit, natuurlik, is dit die estetiese waarde.

Dit is ook baie belangrik om te besef en onthou dat die “mooi” of “wow” van ‘n rok meer waardevol is omdat iemand dit gedink, geskets en gemaak het. Dus, omdat dit uitgedink is, is daar intelektuele waarde en dit is moeilik om ‘n prys op te sit. Dis iemand se intelektuele eiendom en dit is bitter kosbaar, want dit is nie iets wat jy kan leer soos biologie nie, jy kan dit nie by Pick ‘n Pay koop nie en jy kan dit nie uit ‘n boks haal en gebruik wanneer jy nodig het nie. Nee, dis iets waarmee jy gebore is, ‘n talent en ja, deur te swot, te werk en jou vaardigheid te verfyn raak jy beter en ‘n meester van jou kuns.

So ons het die basiese bedryfskostes, die ervaring en die estetiese waarde wat die prys beinvloed. Wat van die fisiese, die lap? As ontwerpers het ons almal ons eie manier van doen en ons eie voorkeure vir waar ons lap koop en wat ons gebruik. Waar ek wel die meeste teleurstelling sien onder bruide is wanneer hulle ‘n vol kant rok wil hê en hulle besef nie hoe duur kant is nie. Dis duur. Afhangende van waar jy gaan sal die prys verskil, maar wanneer jy beaded Chantilly Lace reguit uit Frankryk wil hê gaan dit orals duur wees. Ja, daar is goedkoper kant, genugtig daar is selfs kant wat R80/m kos, maar ek gaan jou ‘n brief gee dit gaan nie dieselfde lyk as die Chantilly nie. Dit gaan soos ‘n goedkoop rok lyk.

Weereens, ontwerpers werk op verskillende maniere en ek kan net praat oor my eie voorkeure. Ek verkies kwaliteit bo kwantiteit. Ek voel ‘n rok lyk mooier met ‘n goeie kwaliteit sy en kant. Ek sê nie ons moet die duurste vir jou gebruik nie, maar ten minste ordentlike kwaliteit. So ek verkies rou sy bo Taffeta, en Duchess satyn bo Bridal satyn. Dit is wat bydra tot my rokke en die kwaliteit daarvan. Dit is dan ook hoekom my rokke, en ander ontwerpers se rokke wat dieselfde lappe gebruik, dan duurder gaan wees as ‘n rok wat ingevoer is van China wat net uit Taffeta en ‘n Nylon kant bestaan.

Met ander woorde, veronderstel ‘n besigheid moet R100/m² betaal op ‘n werksperseël van 72m² wat   R7 200/maand kos plus ‘n ateljee/winkel om kliënte te sien teen ‘n ekstra R3 600/maand, dit is R10 800/m vir huur. Plus 1 masjinisteen R1200/week en een voleinder teen R1050/week dit is R2050/week en R8 400 per maand. Plus elektrisiteit teen R2 000/maand (strykysters, lugversorger ens), saam met onderhoud, versekering en vervoer teen R4000/maand kyk ons na R25 200/maand sonder ons eie salaris. Gee onsself so R15 000 salaris en dit is R40 200 per maand. Ons kyk na 22 werksdae gemiddeld per maand en 8 ure per dag wat daar fisiese werk gedoen word werk dit uit op R228.40/uur. En, sou jy ‘n rok kies wat 80 ure se werk nodig het sal dit R18 272 kos vir die ure sonder die lap. Maar, ons mag dalk aan 2, 4 of 10 rokke op ‘n slag werk wat beteken ons kan minder per uur per rok vra en omdat ons in hierdie scenario 3 mense is wat op ‘n slag aan ‘n rok werk beteken dit ons het meer ure per dag en kan dus minder per uur vra. Hou tog ingedagte dat daar, in hierdie scenario, nog nie geld op bemarking of lap vir nuwe rokke spandeer is nie.

Let wel, hierdie nommers is skattings, baie van ons werk vanuit ons huise, of het ‘n ateljee op ons erf aangebou of met ‘n kreatiewe manier voorendag gekom om kostes te spaar. Maar, sou ons minder as ons minimum R/uur vra sal ons nie ons huur kan betaal nie, of ons naaldwerkster nie. Glo my, ons betaal hulle altyd, dis meestal ons wat onsself in die voet skiet en onsself minder betaal.

So my liewe bruid, dis nie lekker om te hoor hoe ons te veel vra nie. Die boodskap wat ek wil oordra is dat ons nie die geld verdien vir ons harde werk nie. Dit is elke bruid en bruidegom se reg om te spandeer wat hulle begroting toelaat, maar dit is baie onregverdig om die ontwerper, fotograaf, bloemis of koekbakster die boelie te maak wat “te duur” is. Daar is niks mee fout om ‘n rok te huur as jou begroting nie toelaat vir ‘n ontwerpersrok nie. Daar is wel fout daarmee om iemand en hulle werk te probeer verneder en kleineer omdat dit volgens jou begroting en jou opinie te veel kos.

Nog nooit sal een van ons kom na jou en vir jou sê “Ek kan nie glo wat jou salaris is nie, dit is te veel en jy verdien dit nie.” Nooit. Wat ek vra is om die ontwerper se pryse te respekteer en te verstaan dat daar redes is vir die pryse, dat dit nie net uit die lug kom en terloops geprys word nie.

Ek hoop dit bring ‘n bietjie meer lig op die onderwerp en dat daar ‘n bietjie meer inligting is oor die pryse van trourokke.

Volgende keer kyk ons ‘n bietjie na die onrealistiese verwagtinge van bruide as gevolg van die effekte van Photoshop.

cp_0177

Diensverskaffers:

Fotograaf: Claire Thomson Photography | Teks: Janita Toerien

 

 

Leave a Reply

Your email address will not be published. Required fields are marked *